متل مابيقولو الصراحة راحة
بس شو يعني صراحة؟ وليش الصراحة تفهم بمعنى وئاحة أحيانا
يعني مثلا مثلا إذا شفت شي موظف (حكومي او خاص مشان عدم التعميم) عم يرتشي وانت واقف عالدور عندو فيك تروح لعندو وتقلو انت موظف مرتشي ؟ يعني هلئ هي وقاحة ولا صراحة؟
اذا لقيت شي واحد (اجلكم الله) غبي , غبي رسمي يعني يمكن حاصل على شهادة بالغبى فيك تقلو انت واحد غبي؟ شو ردو ياترى؟ رح يقلك انت واحد صريح ولا وقح ؟
اذا شي ضيف سَمك دم وضل قاعد عندك شي خمس ست ساعات على لت وعجن فيك تقلو والله داء خلئي منك تيسر على بيتكون؟ شو رح يقول بقلبو ؟ يالطيف شو انك صريح؟ او يالطيف شو هالوقاحة؟
اذا استاذ خصوصي عم يعطي درس لابنك وابنك (عدم المؤاخذة )ضاربين فيوزاتو وماعم يتجاوب وقلك الإستاذ والله ياسيد فلان ابنك علتان مو نفعان للدراسة ومارح يطلع معو شي (وطبعا الاستاذ معروف وعم ياخد هديك الحسبة عالدرس) ياترى هالاستاذ وقح ولا صريح؟
اذا رئيسك بالعمل صار عندو شي مناسبة (ولادة مثلا , نجاح ابنو بالبكاتوريا) وكل رفقاتك جابولو هدية تمسيح جوخ ورش قنبز , وانت مابتطيئو لهلمدير فيك تقول لرفئاتك انك مارح تجيب هدية او تزورو لانو مابتطيئو؟
يعني وينك الأمثلة كتيرة وفي أمثلة مابتنحكى !
وبالنهاية الصراحة راحة وانت مابتعرفش (على قولة مطربة الجيل الصاعد إلى الهاوي مروى)
كون صريح بالنهاية بتنام مرتاح
بس مابضمنلك وين تنام !
ونلتقي !
حكو معنا مو علينا