كل ما رحت على دائرة حكومية عنا بحس حالي لازم كون مدجج بالأسلحة المطلوبة لهي المهمة الشاقة كتير(الطحش,التدفيش,العين الحمرا,الوقاحة ….. إلخ وهالإلخ فيها شي مية سلاح)
بتفوت لعند الموظف بشي دائرة طبعا بتكون داير الشام كلها لبين ماوصلت لعندو من طابع من هون وتوقيع من هون وتأجيل من هون بقلك هالباشا شغلتك مو عندي!!
لك لكن عند مين؟؟ واذا كانت عندو بيقلك رجاع بعد إسبوع!!(هاد بأحسن الحالات إسبوع)
وبعد ما بتكون وقفت عالدور واجى دورك بعد جهد جهيد بيقلك لازم تصورلي هالوراق بالطابق الارضي وترجع لعندي !! والدور اللي عليه شي الف زلمة شو بعمل فيه؟ بيقلك والله لازم تستنى دورك بس تجي !
ليش أديش بتكلف مكنة التصوير والورق؟؟
صدقوني اذا بكل مكتب لك مو بكل مكتب بكل طابق بس آلة تصوير لو حتى بالمصاري بتكونو وفرتو عالمواطن وقفة الله مولاها وبتكونو اصلا وفرتو على حالكون وقت
لك معقول معاملة بيضل الواحد عم يفتل فيها كل دوائر الدولة على كعبو لحتى تصير
وبتذكر هون بإوربا كل موظف على طاولتو في آلة تصوير وبصورلك ببلاش وبيكون في الف مراجع ما بيحتاجو أكتر من ساعتين تلاتة الكل لانو المديرية او الدائرة بتكون كاتبتلك شو لازم تجيب معك على موقعها عالانترنت ومافي ورقة يانصيب بتطلعلك وقت بتصل عند الموظف
زهادا ماحكينا كم الف توقيع بدها المعاملة !!
عنا الحمد لله في دوائر كبيرة ووزارات مالها موقع عالانترنت وان وجد مو شغال
الحقيقة
شي ناهي 
لاتواخذونا
أودعناكم
حكو معنا مو علينا