من فترة كان عندي موعد عند بروفيسور بأحد جامعات ألمانيا
وقبلها بفترة كنت كتير خايف ومتلبك ومالي عرفان كيف ممكن احكي معو او حتى افتح حديث معو (الموضوع كان عن شغل بالجامعه)
وضليت فترة حضر وخمن شو ممكن يسألني أسئلة أو كيف ممكن يدور الحديث بيناتنا
والصراحة كنت خايف كتير ومتلبك وهالحكي قبل الموعد بشي 4 ايام
المهم مالكون بطول السيرة اجى اليوم المرتقب ووصلت على المانيا واستدليت عالجامعه ورحت لعندو
فتت لعند السكرتيرة بالاول قلتلها عندي موعد مع عمو البروفيسور, قالتلي تفضل هو بإنتظارك بمكتبو, طبعا هون دقات قلبي صارو شي الف بالدقيقة
فتت لعندو لقيتو قاعد ورا مكتبو عالكرسي وعم يتصفح كتاب, اول ما شافني مباشرة وقف على حيلو واجى سلم علي
واللي فلجني عن جد كنت لابس جاكيت قلي هاات لعلقلك ياه لانو الغرفة مدفاية واخدو مني وفتح خزانة عندو وحطو على عليقة وعلقلي ياه
انا انفلجت الصراحة, يعني واحد متل هاد انا بعازتو مو هو بعازتي, كان لبق كتير معي لدرجة انو انا استغربت جدا
وحتى شافني مرتبك قلي اذا بدك خود وقتك لبين ماتجمع افكارك واذا بدك بطلبلك شي تشربو, شو بتحب تشرب؟
قلتلو لا شكرا ولا شي
وبلشنا حديث شي تلت ساعة وبعدها قلي خلينا نعمل جولة بالجامعة تتعرف على اقسامها
وانا كل شوي وشوي فكر بالموقف وأصفن مابعرف ليش !
المهم خلصت زيارتي وكانت كتير حلوة, كانت اكتر من حلوة, كان التعامل كتير لطيف وكتير ممتاز حتى
حسيت حالي بني آدم رسمي
يعني واحد لا عمرو من عمري ولا ثقافتو من ثقافتي ولا دينو من ديني ولا بلدو من بلدي ويمكن عنا ألاف الفكر المتناقضة بس حسيت منو بالإحترام
الحقيقة شي ناهي للغاية 
حكو معنا مو علينا