أنا بحب الشــــــــام

 

أنا بحب الشام

بحب الهوى اللي بالشام حتى لو فيه مازوت ,بحب الحارات بالشام حتى لو فيها بياعين غاز غاز ,بحب ناس الشام حتى لو في منون بيطلعوك عن دينك احيانا

بحب أرض الشام حتى لو كلها جئجئة وحفر وغبرة ,بحب سما الشام ولو كانت مضبضبة دائما من الدخان

لك عندي كاسة شاي بقهوة النوفرة او اي قهوة بالشام القديمة بتسوى كلشي في كوفي شوبات (جمع cafe shop) وسندويشة فلافل عند اخر خط المهاجرين او عند الجندي المجهول او بالربوة بتسوى كلشي في تشيز برغر

وتمشاية بسوق الحمدية احلى بمليون مرة من اي شارع بإوربا ,وروحة عالبزورية بتسوى كل علب البهارات المختومة الجاية من الصين والهند

لك الشام مافي احلى منها وعلى قولة المتل ما بتعرف خيرو لتجرب غيرو ,يمكن لانو انا برا الشام ومشتقلها عم احكي هالحكي بس سدئوني الشام جنة والله جنة

واللي مفكر يسافر ويتركها يقعد مع حالو شوي ويفكر لانو الشام مابتنترك لانها حنونة

يمكن حدا يقلي انت لانك متغرب هيك عم تحكي , اي بجوز صح بس انا وقت سافرت مافكرت وهلئ كلشي بفكر فيه انو ارجع عالشام ونام بالشام واتمشى بالشام وعيش اللي بقي من هالعمر بالشام

 

لاتواخذونا فتقنالكون جروحاتكون

 

اودعناكم